جزعت انا والحر طبعه جزوعـــــــــي=يهوش لو توطا حدوده ويرتــــــــــــــــاع
يشوم مايرضى بغير الطلوعـــــــــي=مايقبل الذله ولاينزل القـــــــــــــــــــاع
اسبوع ماكنه مضالي سبوعــــــــي=دهر حسبته من هولات واوجـــــــــاع
ماحسبت قالت من اقصى ربوعــي=بنت لها بالشات منزل ومطـــــــــــلاع
وتجمعت من كل شكل ونوعـــــــي=مصايب صلب الحشا منها مــــــــــــاع
ياحيف يابنت الشجاع البتوعــــــي=اسمك مع للي بالردى صيتــــهن ذاع
واخوانك اللي ينطحون الجموعـــي=وخوالك اللي للمعادين بتـــــــــــــــاع
عمامك اللي جارهم مايجوعــــــي=ويلان لو عاشوا على خيش ورقــــاع
واليوم اشوفك تقبلين الخضوعـــي=واخوك اللي لانتخى باسمك يطــــاع
يابنت بيدينك سلاح يروعــــــــــــي=لوتنتخين بوايل الصعب ينصــــــــــــاع
من كل فج عيال وايل تفـــــــــوعي=والدم لعيونك من شضى الروس نباع
ذلك يذل رجال حولك دروعـــــــــي=ورقابهم مادنقت ذل وخضــــــــــــــــاع
يابنت جوزي عن رذيل الطبوعـــي=مادام باقي لك عن الدرب مرجــــــاع
للعز لك يابنت وايل رجوعـــــــــــي=وينوف بك منهو عن الاصل ماضـــــاع
تفرجوا والشر مشى له فروعـــــي=وكل يعرف ان الجرب يعدي بســـــاع
واللي عليهم هاقي بالفزوعــــــي=استنكروا فعلي غريبين الاطبــــــــاع
من فعلهم والله تزايد فجوعــــــــي=كيف الرجال ولا لها قلب ينـــــــــــلاع
بحميتي يابنت مالي طموعـــــي=جزعت انا والحر بالطبع جـــــــــــــزاع
اللي على بيبان غيره طموعــــي=يلقى على بابه عيون طمــــــــــــاع
والنبته اللي مالها بالارض قوعــي=تمسي ويشلعها مع الصبح شــلاع
شمايل منها رضعنا الطبوعـــــــي=ومنها مشينا دربنا حق وسنــــــــاع
وجفون عيني مارضت بالهجوعي =وشلون انام وبنت الاحرار تنبـــــــاع
صلاة ربي عد نبت الزروعــــــــــي =وعداد مابرف مع المزن لمـــــــــــاع
على النبي عداد ركع الركوعــــي=اللي بيوم الحشر للخلق شـــــفاع
عندما رأيت الواقع الحالي استحضرت هذه القصيدة للشاعر محمد الحصاد العبدلي
التوقيع
إذا أقبلـت الفتنة عرفهـا العلمـاء
إذا أدبرت الفتنة أدركها الجهلاء
بلادي وإن جارتْ عليّ عزيزةٌ ... وأهلــي وإن ظنّـوا عليّ كرامُ